اهمية الثلاجة فى الحفاظ على الاكل.طرق تنظيم الثلاجة

الثلاجه :-هي اهم جهاز فى مطبخك لأنها اللي بتحافظ على اكلك من الفساد والتلف وبتحسي باهميتها لما الكهربا بتقطع وتبتدى تفكري في الاكل اللي في الثلاجه ولا اللى فى الفريزر  يا ترى هيحصلهم ايه ؟

تعالوا نتعرف على اهميه التبريد فى الحفاظ على الاكل من البكتيريا، والثلاجه ودرجات الحراره المطلوبه وطرق التخزين السليم فيها وطريقه فك اللحوم الصح، وازاى أنظم الأكل فى الثلاجه والتجميد بطريقه صحيحه وكمان نظافه الثلاجه تكون ازاي معلومات مهمه كثير خليك معانا فى 

Healthy Life حتعرف أكثر.....

أهميه التبريد:- البكتيريا زي ما قلنا قبل كده في حلقات سابقه موجوده في كل مكان حوالينا في التربه و في الميه وفي الاكل وحتى في الهوا اللي بنتنفسه ،ولما البكتيريا دي بتلاقي فرصه انها تنمو وتتكاثر مابتتأخرش، والفرص دي بالنسبه لها هي الاكل والرطوبه ودرجات الحراره المناسبه لنموها ممكن توصل لدرجه تصيب بالمرض ،ودرجه الحراره المناسبه لتكاثرها ونشاطها هي من 5 درجه مئويه الى 60 درجه مئويه ودي بيسموها المنطقه الخطره وبتتضاعف فيها كل 20 دقيقه زي الفائده المركبه كده 😂عشان كده لازم نضبط درجه حراره الثلاجه على 5 درجه مئويه أو أقل عن طريق ترمومتر الثلاجة ⏲عشان نوقف نموها ونحافظ على الاكل من التلف ، وطبعا لما الكهربا بتقطع ده ممكن يعرض الاكل اللي جوه الثلاجه للفساد وده لو فضلت الكهرباء قاطعة لمده ساعتين أو أكثر و درجه الحراره زادت عن 5 درجة مئويه عشان كده خلي باب الثلاجه مقفول عشان تحافظى على نسبه البرودة الموجوده وما تفتحيش الباب طول ما الكهربا مقطوعه على قد ما تقدري.

مكونات الثلاجة:-

١- باب الثلاجة :- ما يتحطش فيه اي اكل عايز درجه حراره قليله لان هو و درج الثلاجه اللي تحت أدفي مكانين في الثلاجه ودائما درجات حرارتهم بتكون مذبذبه دا غير انك تلاقى ابنك الصغير فاتحهولك ليل نهار وياخد حاجه ويسبهالك مفتوحة ويمشى عادي!😤

فمتحطيش فيه بيض مثلا ،البيض بيفضل على رف الثلاجه وطبعا في الفنادق بيتخصص ل البيض ثلاجه اسمها (ثلاجه البيض)

٢-درج الثلاجه:- اللي تحت هايل لتخزين الخضار والفاكهه قبل كده قولنا في حلقه سابقه وهى حلقه اختيار تخزين الخضار والفاكهه ازاى نخزنهافي الثلاجه كويس.
 تابع الحلقه على Healthy Life
لتخصيص كل واحد على حسب الرطوبه المناسبه له
٣- الأرفف وده اللي بيتخزن فيه كل الاكل اللي بيحتاج درجه حراره اقل وهو اي أكل جاهز او مطبوخ او خام ،وطبعا بالنسبه لتخزين المطبوخ يبقى أربع أيام بالنسبه للدواجن واللحوم المفرومه الخام ويوم الى يومين للمطبوخ.
أما البقوليات الغير مطبوخة زى العدس والفول والفاصوليا البيضا واللوبيا والرز والمكرونه وكمان الدقيق والسكر والملح مابيتخذنوش في الثلاجه عشان الناس اللى بتزحم الثلاجة ع الفاضى🙄، ممكن نخليهم في درجه حراره الغرفه عادي بره بس مش أعلى من 25 درجه مئوية.
تنظيم الثلاجة :- نصائح الرص السليم للثلاجة..
أولا أى أكل مطبوخ حنحطوا في الثلاجه لازم نبرده ونسيبه يهدي لغايه لما بخار الميه يطلع كله من الاكل او ممكن نحطه فى (حمام مياه) ونغطيه كويس بغطاء محكم عشان ما يتعرضش للرطوبة أو ميكروبات وبعد ما يبرد نحطه في الثلاجه مقفول عشان ما يلقطش ريحه من الاكل اللي جنبه وأكيد نبعد الاكل المطبوخ عن الاكل النيئ.
ركزوا فى اللى جاى.......
١- حطى الجديد ورا القديم :- اي أكل جديد بتشتريه من السوبر ماركت حطيه خلف القديم عشان تستهلكى القديم الأول عشان تحافظى على تاريخ الصلاحيه
٢-حطى كل حاجه فى الثلاجة مغلفه ومتغطيه و إستخدمي (أكياس حفظ الطعام )بس تكون اكياس كويسه ومطابقة للمواصفات.فى السوق موجودة كتيرررر
٣-حطى على كل حاجه ملهاش تاريخ مطبوع إستيكر وإلزقيه على الكيس ( أكياس حفظ الطعام ) وأكتبى عليه تاريخ الصلاحيه عشان تبقي عارفه إمتى حطتيه و إمتى هتستخدميه و في اي تاريخ.

٤- ما تحطيش مفارش و كلام فارغ ممكن يمنع وصول الهواء البارد للأرفف اللي تحت.
٥- إذا فتحتى علب أكل معدنيه حطي الأكل في علبه بلاستيك في الثلاجه عشان الماده المعدنيه بعد فتح العلبه ممكن تدخل وتغير فى خواص الاكل فيستحسن نحط الأكل فى علب بلاستيك وفي مواصفات برده لعلب البلاستيك السليمه.
٦-الرف الاول العلوى:- حطى عليه اللبن ومشتقاته زي الجبن والكريمات والزبادي والزبده..إلخ
٧-الرف الثاني الوسط:- الاكل المطبوخ والحلويات البارده بس سيبى مسافه بينهم عشان التهويه.
٨-الرف الثالث السفلي :- حطي عليه اللحوم والدواجن والاسماك في اطباق عميقه عشان ما تسربش ويكون في علب ويبقى لمده مؤقته قبل الطبخ او قبل التفريز مباشره عشان ميفسدش.

⬅️تابع المدونة عشان تعرف أكثر عن الفريزر وأيه اللى بيتخزن فيه وتسييح الثلج والتفكيك السليم للحوم والدواجن والثلاجة ونظافتها😉
إضغط المدونة :-
  https://tinyurl.com/y23b6ccb

للاشتراك فى القناة على اليوتيوب:
https://tinyurl.com/y2wkve6g
ولمتابعة جديدنا فعل زر التنبيهات "الجرس"
نتمنى لكم ولاسركم دوام وتمام الصحة والعافية.